Al-Nassr zgjeron epërsinë në krye të tabelës, Ronaldo rikthehet me dy gola
Cristiano Ronaldo udhëhoqi Al-Nassrin drejt një fitoreje spektakolare 5-2 ndaj Al-Najma të premten mbrëma, në kuadër të javës së 27-të të Ligës Profesioniste Saudite, duke shënuar dy gola dhe duke bërë një paraqitje të shkëlqyer.
Me këtë triumf, Al-Nassri arrin në 70 pikë në krye të klasifikimit, duke e thelluar në gjashtë pikë diferencën ndaj ndjekësit Al-Hilal, i cili luan kundër Al-Taawoun.
Golat për Al-Nassrin u shënuan nga Abdullah Al-Hamdan (45+8′), Sadio Mané (dy gola: 45+9′ dhe 90+5′) dhe Cristiano Ronaldo (56′ dhe 73′), ndërsa për Al-Najma realizuan Rakan Rajeh (44′) dhe Filipe Cardoso (47′).
Kjo ndeshje shënoi rikthimin e Ronaldos në fushë pas një mungese 34-ditore, shkaktuar nga një dëmtim në kofshë. Ai kishte munguar në dy takimet e fundit të kampionatit, por u rikthye në formacionin bazë nga trajneri Jorge Jesus.
Ylli portugez e nisi sfidën fuqishëm, duke krijuar disa mundësi shënimi që në pjesën e parë, përfshirë një goditje të fortë në minutën e 17-të, e cila u prit nga portieri kundërshtar, dhe një tjetër rast të rrezikshëm në minutën e 27-të.
Megjithatë, pavarësisht dominimit të skuadrës vendase, ishte Al-Najma ajo që kaloi e para në epërsi në minutën e 44-të me golin e Rajeh, pas një kundërsulmi të shpejtë.
Por reagimi i Al-Nassr ishte i menjëhershëm dhe vendimtar. Në pjesën e dytë, Cristiano Ronaldo mori frenat e ndeshjes në dorë, duke shënuar dy herë dhe duke udhëhequr ekipin drejt një triumfi të rëndësishëm që e mban në krye të kampionatit.