Ish-presidenti amerikan Barack Obama do të jetë drejtues i një podcasti të ri kushtuar librave që, sipas tij, kanë ndikuar thellësisht në mënyrën se si ai e sheh botën dhe shoqërinë.
Podcasti do të titullohet “A Great Book with Barack Obama” dhe pritet të nisë më 24 shtator në platformën Audible.
Seriali do të përbëhet nga gjashtë episode dhe do të realizohet nga Audible, kompania në pronësi të Amazon, në bashkëpunim me Higher Ground, kompaninë e produksionit të Barack dhe Michelle Obama.
Në secilin episod, Obama do të diskutojë një nga librat e përzgjedhur prej tij së bashku me një të ftuar, emrat e të cilëve ende nuk janë bërë publikë.
Gjashtë librat e përzgjedhur nga Obama
Mes veprave që ish-presidenti ka zgjedhur për podcastin janë “Song of Solomon” nga Toni Morrison dhe romani i famshëm i spiunazhit “Tinker Tailor Soldier Spy” nga John le Carré.
Lista përfshin gjithashtu “The Fire Next Time” të James Baldwin, “All the Pretty Horses” të Cormac McCarthy, “Gilead” të Marilynne Robinson dhe “All the King’s Men” të Robert Penn Warren.
Sipas Obamës, këto libra kanë qëndruar me të gjatë periudhave të ndryshme të jetës dhe secili prej tyre ofron një këndvështrim të veçantë mbi përvojën njerëzore.
“Librat e mëdhenj më kanë ndihmuar gjithmonë të kuptoj se kush jam dhe çfarë besoj”, tha Obama.
Ai shtoi se për podcastin ka ftuar miq për të diskutuar pse këto vepra vazhdojnë të kenë rëndësi, si mund të ndikojnë në mënyrën se si kuptojmë veten dhe të tjerët dhe pse letërsia mbetet e rëndësishme edhe sot.
Obama shpreson që dëgjuesit të frymëzohen për të zbuluar ose rilexuar libra që mund të ndryshojnë mënyrën se si e shohin veten dhe botën përreth.
Një traditë e gjatë me rekomandimet e librave
Barack Obama prej vitesh ndan publikisht librat e tij të preferuar.
Ai publikon rregullisht lista leximi gjatë verës, si dhe përmbledhje në fund të vitit me libra, filma dhe muzikë që i kanë tërhequr vëmendjen.
Lista e tij e verës së këtij viti përfshinte mes të tjerash “Kin” nga Tayari Jones, “Vigil” nga George Saunders, “The Things We Never Say” nga Elizabeth Strout, “Transcription” nga Ben Lerner dhe “Cool Machine” nga Colson Whitehead.
Ndryshe nga listat e tij të zakonshme, të cilat shpesh përmbajnë libra të sapobotuar, pothuajse të gjitha veprat e zgjedhura për podcastin janë botuar gjatë shekullit XX.
Përjashtim bën “Gilead” i Marilynne Robinson, i publikuar në vitin 2004.
Obama dhe Robinson kanë pasur prej kohësh një raport intelektual dhe korrespondencë mes tyre. Ish-presidenti e kishte ftuar shkrimtaren për darkë në Shtëpinë e Bardhë, ndërsa në vitin 2012 i dha asaj Medaljen Kombëtare për Shkencat Humane.
Me “A Great Book with Barack Obama”, ish-presidenti rikthehet kështu te një prej interesave të tij më të njohura publike, letërsia, duke e kthyer këtë herë listën personale të leximeve në një seri bisedash për kulturën, shoqërinë dhe mënyrën se si librat mund të formësojnë botëkuptimin e një njeriu. /GazetaExpress/