Sindikata e Re e Punëtorëve të Korporatës Energjetike të Kosovës (KEK) ka njoftuar një protestë të radhës, e cila do të mbahet më 19 nëntor në Prishtinë.
Protesta është caktuar për të enjten, duke filluar nga ora 11:00, para Drejtorisë së KEK-ut, në objektin “TOSKAN”.
Sindikata ka theksuar se kërkesat e punëtorëve mbeten të pandryshuara deri në përmbushjen e tyre. Dy kërkesat kryesore janë ngritja dhe nivelizimi i pagave për punonjësit e KEK-ut, si dhe pagesa e pagës së 13-të për të gjithë stafin e korporatës.
Në njoftimin e saj, Sindikata e Re ka vënë në dukje se protesta synon mbrojtjen e të drejtave dhe dinjitetit të punëtorëve, duke shërbyer si vazhdim i kërkesave të tyre të mëparshme.
Ajo u ka bërë thirrje të gjithë punëtorëve që të marrin pjesë masivisht në protestë, duke qëndruar të bashkuar për realizimin e objektivave të tyre.
“Bashkimi ynë është fuqia jonë! Zëri i punëtorëve nuk mund të injorohet!”, thuhet në mesazhin e lëshuar nga sindikata.