Qëllimet e administratës Trump për konfliktin me Iranin janë rishikuar dhe reduktuar, sipas një raporti të CNN. Një nga sfidat kryesore për administratën Trump në përpjekjen për të larguar konfliktin me Iranin, ishte lista e objektivave tepër striktë dhe të papërkulshëm që Presidenti Donald Trump dhe ekipi i tij kishin përcaktuar fillimisht.
Këto objektiva përfshinin dorëzimin pa kushte të Iranit, ndryshimin e regjimit, garantimin që Irani të mos zotërojë kurrë armë bërthamore, dhe ndalimin e mbështetjes së Teheranit për grupet e tij aleate në Lindjen e Mesme, si Hezbollahu.
Ndërkohë që ky konflikt – tashmë në muajin e gjashtë – ka vazhduar, kjo listë objektivash është rishikuar ndjeshëm dhe reduktuar. Së fundmi, zv.Presidenti J.D. Vance duket se i ka reduktuar ato në mënyrë drastike, duke sinjalizuar se administrata mund të jetë e gatshme të pajtohet me më pak – ndoshta edhe shumë më pak se sa ishte parashikuar.
Gjatë një interviste për Fox News të enjten, Vance u pyet sesi mund të përfundojë ky konflikt. Ai prezantoi dy objektiva kryesorë.
“Është thelbësore të sigurohet që vendet e Gjirit të vazhdojnë furnizimin me naftë dhe gaz në ekonominë botërore, duke garantuar kështu stabilitetin e çmimeve të energjisë”, tha ai, duke shtuar: “Ky është objektivi numër një: Të mbahen çmimet e naftës dhe gazit të përballueshme për amerikanët anembanë vendit.”
“Dhe më pas, sigurisht, objektivi numër dy është të sigurohemi që Irani të mos posedojë kurrë armë bërthamore.”
Kjo listë ndryshon nga objektivat fillestarë të administratës, dhe renditja në të cilën Vance i prezantoi ato është domethënëse.
Kur u pyet të premten për komentet e Vance, zëdhënësja e Shtëpisë së Bardhë, Karoline Leavitt, këmbënguli se “të dyja objektivat janë njëlloj të rëndësishëm për presidentin”.
Tradicionalisht, administrata e ka theksuar parandalimin e posedimit të armëve bërthamore nga Irani si shqetësimin kryesor.
Edhe nëse objektivat shihen vërtet si të barabarta nga administrata, përfshirja e çështjes së çmimeve të naftës dhe gazit – dhe jo e çështjeve të tjera – shënon një ndryshim të rëndësishëm në fokus.