Presidenti Donald Trump ka reaguar pas një incidenti të rëndë sigurie në Uashington D.C., ku u raportuan të shtëna gjatë një eventi, duke theksuar se ky është “kostoja e politikës në SHBA”. Ngjarja ka risjellë në qendër të vëmendjes rreziqet që shoqërojnë angazhimin politik në Shtetet e Bashkuara.
Gjatë një konference për shtyp në Shtëpinë e Bardhë, Trump deklaroi se as niveli më i lartë i sigurisë nuk mund të garantojë mbrojtje të plotë përballë individëve të rrezikshëm. “Mund të kesh sigurinë më të madhe në botë, por nëse ke një person me çrregullime mendore, ai mund të krijojë probleme,” u shpreh ai para gazetarëve.
I pyetur nëse është e mundur të ulet tensioni politik pas incidentit, presidenti dha një përgjigje ironike, duke sugjeruar se kjo do të ishte e mundur vetëm nëse ai tërhiqej nga aktiviteti politik. Sipas tij, angazhimi në politikë në SHBA ka një “kosto”, duke iu referuar rrezikut të vazhdueshëm që vjen me këtë rol.
Trump theksoi gjithashtu se dhuna politike nuk është një fenomen i izoluar, por ekziston në të gjithë botën. “Nuk mund të imagjinoj ndonjë profesion më të rrezikshëm,” tha ai, duke shtuar se “asnjë vend nuk është imun” ndaj kësaj dukurie.
Ky incident shënon të tretin me armë zjarri, ose tentativë të tillë, të lidhur me Trump në vitet e fundit, duke krijuar një model shqetësues për sigurinë e figurave të larta politike në SHBA. Kujtojmë se në korrik 2024, gjatë një tubimi në Butler, Pensilvani, një 20-vjeçar qëlloi ndaj tij, në një ngjarje që u konsiderua thelbësore për rrugëtimin e tij presidencial.
Ngjarja e fundit rikujton gjithashtu një episod historik, pasi ndodhi në të njëjtin hotel ku ish-presidenti Ronald Reagan u qëllua në vitin 1981.
Pavarësisht incidentit, raportimet nga mediat amerikane thonë se Trump është shfaqur relativisht i qetë dhe optimist, edhe pse rreziku ndaj tij duket të jetë një realitet që ai e ka pranuar shpesh gjatë karrierës së tij politike.
Hetimet për zbardhjen e plotë të ngjarjes janë ende në vazhdim, ndërsa autoritetet po analizojnë motivet dhe rrethanat që çuan në këtë incident të fundit.