Hajrush Behluli, bashkëshorti i këngëtares së njohur Shkurte Fejza, ka reaguar ashpër ndaj ndalimit të Jakup Krasniqit në Hagë, duke e cilësuar atë si padrejtësi ndaj një figure që ia ka kushtuar jetën çështjes kombëtare. Ai ka shprehur shqetësimin e tij për fatin e Krasniqit.

Behluli thekson se Krasniqi vuajti dhjetë vjet burg në burgjet jugosllave për idealin e lirisë, ndërsa sot, pas shumë dekadash, ndodhet sërish pas hekurave, këtë herë në Hagë.

Ai vë në dyshim procesin gjyqësor, sidomos dëshmitë e fshehta dhe pretendimet që, sipas tij, bazohen kryesisht në materiale të përgatitura nga shërbimet sekrete serbe.

Behluli kritikoi gjithashtu heshtjen e shoqërisë përballë fatit të ish-zëdhënësit të UÇK-së, duke theksuar se përgjegjësia për këtë gjendje nuk bie vetëm mbi institucionet e drejtësisë, por edhe mbi shoqërinë kosovare.

Ai thekson se Jakup Krasniqi dhe bashkëluftëtarët e tij nuk kërkojnë mëshirë, por drejtësi, gjykim të paanshëm dhe respekt për dinjitetin njerëzor.

Behluli e përmbyll reagimin e tij me një thirrje të fuqishme, duke kërkuar që sakrifica e çlirimtarëve të mos harrohet dhe që shoqëria të mos heshtë përballë asaj që ai e konsideron padrejtësi. “Të mos lejojmë që sakrifikuesit të kalben në burgje, ndërsa përfituesit e tradhtisë të jetojnë në privilegje!” përfundon ai.