Bedri Hamza voton në Mitrovicë, fton qytetarët të ushtrojnë të drejtën demokratike
Bedri Hamza, kryetar i Partisë Demokratike të Kosovës (PDK) dhe kandidat për kryeministër, ushtroi sot të drejtën e votës në Mitrovicë, siç raporton Ekonomia Online.
Pas votimit, Hamza u bëri thirrje të gjithë qytetarëve të Kosovës që të dalin masivisht në qendrat e votimit dhe të shfrytëzojnë të drejtën e tyre kushtetuese. Ai theksoi rëndësinë e pjesëmarrjes në procesin zgjedhor, duke u kërkuar qytetarëve të votojnë në mënyrë të qetë dhe demokratike, sipas bindjeve të tyre politike.
“Unë, bashkë me familjen time, sapo ushtruam të drejtën tonë për të votuar. Ftoj të gjithë qytetarët e Kosovës të ushtrojnë këtë të drejtë, të dalin dhe të votojnë në mënyrë të qetë dhe demokratike, sipas bindjeve të tyre politike. Sot vendosim për të ardhmen tonë për katër vitet e ardhshme,” theksoi Hamza.
Gjithashtu, Hamza iu drejtua mediave të pranishme, duke i falënderuar për punën e tyre dhe duke u uruar një ditë të mbarë. “Ju falënderoj shumë për prezencën dhe ju uroj një ditë të mbarë, të qetë. Keni punë, por jam i sigurt që do t’ia dilni,” përfundoi ai.