Aktori Channing Tatum ka reaguar me një postim domethënës në rrjetet sociale, menjëherë pas shpërndarjes së lajmit se ish-partnerja e tij, Zoë Kravitz, është fejuar me këngëtarin Harry Styles.
Në llogarinë e tij personale në Instagram, Tatum ndau një fragment nga një poezi e shkrimtarit John Rendell, të hënën, më 27 prill. Vargjet, që duket se pasqyrojnë një ndarje të dhimbshme, thonë: “Truri dhe zemra ime u ndanë një dekadë më parë / për fajin e kujt ishte / për sa shumë isha shkatërruar / më në fund nuk mund të ishim në të njëjtën dhomë me njëri-tjetrin.” Aktori e shoqëroi këtë postim me këngën “Faith’s Hymn” të Beautiful Chorus.
Ky postim i Tatum erdhi vetëm pak ditë pasi u bë publik lajmi se Kravitz dhe Styles ishin fejuar, pas një lidhjeje tetëmujore. Burime pranë çiftit theksuan se këngëtari është “thellësisht i dashuruar” dhe do të “bënte gjithçka për të”, ndërsa aktorja është “shumë e lumtur”. Sipas këtyre burimeve, “askush në rrethin e tyre nuk është i befasuar” nga ky zhvillim.
Kjo nuk është hera e parë që Zoë Kravitz fejohet. Ajo ka qenë e martuar me aktorin Karl Glusman nga viti 2019 deri në 2020. Më pas, në vitin 2021, ajo filloi lidhjen me Channing Tatum, me të cilin u fejua në vitin 2023, përpara se të ndaheshin një vit më vonë.
Sipas informacioneve të qarkulluara në atë kohë, ndarja e tyre erdhi sepse “ata nuk ishin në të njëjtën fazë dhe vendosën të ndiqnin rrugë të ndryshme”. Një burim tjetër saktësoi se “nuk kishte ndonjë përçarje të thellë” dhe se ata thjesht “vendosën se ishte më mirë të ndiqnin rrugë të ndara”. Vetë Tatum ka qenë i martuar nga viti 2009 deri në vitin 2018 me aktoren Jenna Dewan, me të cilën ka edhe një vajzë.