Takimi Kurti-Abdixhiku për Presidentin përfundon pa deklarata konkrete: Kurti: Do të ketë lajme kur të ketë rezultate
Ka përfunduar takimi i kryeministrit në detyrë, Albin Kurti, me kryetarin e Lidhjes Demokratike të Kosovës (LDK), Lumir Abdixhiku, i cili u përqendrua në çështjen e zgjedhjes së presidentit të ri të vendit.
Takimi nisi rreth orës 20:00 dhe në diskutime ishte e pranishme edhe kandidatja për presidente, Vjosa Osmani.
Pas përfundimit të takimit, Kurti foli shkurtazi për mediat. Ai theksoi se lajmet do të bëhen publike vetëm kur të ketë rezultate konkrete nga diskutimet. “Kur të kemi rezultate nga ana jonë, do të kemi lajme edhe për ju”, u shpreh Kurti.
Ky takim pason atë të zhvilluar të mërkurën e kaluar, ku Kurti dhe Abdixhiku u takuan në përpjekje për të arritur një marrëveshje për zgjedhjen e kreut të ri të shtetit. Kjo marrëveshje synon t’i japë fund krizës institucionale gati dyvjeçare në Kosovë.
Të dy palët patën deklaruar se për herë të parë ishin diskutuar “emra konkretë” për presidentin e ardhshëm të Kosovës. Megjithatë, ata nuk pranuan t’i bëjnë publikë këta emra, duke iu referuar “ndjeshmërisë” së bisedimeve.