Kryeministri i Spanjës, Pedro Sánchez, ka deklaruar se ylli i FC Barcelona, Lamine Yamal, e ka bërë vendin krenar pasi valëviti flamurin palestinez gjatë paradës festive në Barcelonë, ku klubi festonte titullin e La Ligas. Ky veprim shkaktoi reagime të ashpra ndërkombëtare, me Ministrin e Mbrojtjes të Izraelit që e akuzoi futbollistin për “nxitje të urrejtjes” dhe kërkoi që klubi të distancohej nga ai.
Sánchez mbrojti futbollistin, duke theksuar se valëvitja e një flamuri shtetëror përbën shprehje solidariteti dhe jo urrejtjeje. Ai shtoi se Yamal ka pasqyruar ndjenjat e shumë qytetarëve spanjollë në lidhje me Palestinën dhe se kjo është një arsye shtesë për krenari.
Ndërkohë, trajneri i Barcelonës, Hansi Flick, deklaroi se nuk e miratoi veprimin, por e pranoi atë si një vendim personal të lojtarit. Kjo ngjarje vjen në një kohë kur marrëdhëniet diplomatike mes Spanjës dhe Izraelit janë tensionuar ndjeshëm, pas fillimit të luftës në Gaza.