Presidenti amerikan Donald Trump i ka dërguar një paralajmërim të prerë Iranit, duke sugjeruar se Uashingtoni po shqyrton opsione ushtarake dhe se zgjidhja e situatës mund të vijë “në mënyrën e lehtë ose të vështirë”. Ai theksoi se vendimi përfundimtar mbetet në duart e tij.
“Kam një vendim për të marrë lidhur me Iranin,” deklaroi Trump para gazetarëve, ndërsa po largohej nga Shtëpia e Bardhë për një takim elektoral në Ohio. Ai shtoi se Irani aktualisht “është i shkatërruar” dhe se çështja kryesore është nëse situata “do të zgjidhet në mënyrën e lehtë apo në atë të vështirë.” Presidenti amerikan theksoi gjithashtu, sipas tij, se Teherani po heq dorë nga programi i armëve bërthamore.
Paralelisht me këto zhvillime, këshilltarë të lartë të sigurisë kombëtare amerikane janë takuar në mënyrë konfidenciale në Camp David. Objektivi i takimit ishte diskutimi i opsioneve ushtarake kundër Iranit, si dhe situata e konfliktit në Jemen.
Nga ana e tij, udhëheqja iraniane po përgatit një përgjigje ushtarake më të gjerë dhe më të fuqishme, në rast se SHBA-ja do të nisë sulme të reja në shkallë të gjerë. Burime pranë mediave ndërkombëtare raportojnë se komandantë të lartë iranianë po shqyrtojnë zgjerimin e objektivave, duke përfshirë vende që mbështesin operacionet amerikane, madje edhe baza ushtarake jashtë rajonit të Lindjes së Mesme.
Këto tensione shënojnë kulmin e një konflikti shtatëmujor, i cili nisi me sulmet amerikano-izraelite në muajin shkurt. Edhe pse në prill u arrit një armëpushim, armiqësitë midis palëve kanë vijuar në mënyrë sporadike.