Presidenti amerikan Donald Trump ka theksuar se Shtetet e Bashkuara nuk do të nguten drejt arritjes së një marrëveshjeje me Iranin, duke argumentuar se “koha është në anën tonë”. Ai shtoi se bllokada amerikane ndaj porteve iraniane do të mbetet në fuqi të plotë derisa të finalizohet një ujdi.
Përmes një postimi në rrjetet sociale, Trump deklaroi të dielën në mëngjes se “negociatat po zhvillohen në mënyrë të rregullt dhe konstruktive”. Ai sqaroi se i ka udhëzuar përfaqësuesit e tij “të mos nguten drejt një marrëveshjeje, sepse koha është në anën tonë”. Presidenti amerikan shtoi se “të dyja palët duhet të marrin kohën e tyre dhe ta bëjnë siç duhet. Nuk mund të ketë gabime!”, duke vlerësuar se marrëdhënia me Iranin “po bëhet shumë më profesionale dhe produktive”.
Trump përsëriti gjithashtu se Irani duhet të kuptojë se “nuk mund të zhvillojë ose të sigurojë një armë bërthamore”.
Këto komente vijnë një ditë pasi Trump kishte deklaruar se një marrëveshje mes SHBA-së dhe Iranit ishte “kryesisht e negociuar” dhe se Ngushtica e Hormuzit do të rihapej. Kjo sinjalizoi një impuls të mundshëm drejt përfundimit të tensionit që ka zgjatur prej muajsh. Të shtunën, Presidenti kishte shtuar se detajet përfundimtare ende po finalizoheshin, por do të njoftoheshin “së shpejti”, shkruan CNN.