Kryeministri i Kosovës, Albin Kurti, bëri të ditur sot, gjatë nisjes së vizitës së tij në Shtetet e Bashkuara të Amerikës, se janë identifikuar tri viktima nga varrezat masive në Kalludër dhe Jabukë të Zubin Potokut, përmes analizave të ADN-së.
Kurti njoftoi, nëpërmjet një postimi, se janë pranuar tri raportet e para të ADN-së nga Komisioni Ndërkombëtar për Persona të Zhdukur, të cilat konfirmojnë identitetin e personave të zhvarrosur. Këto viktima besohet se i përkasin “Grupit të Intelektualëve”, kryesisht qytetarë nga Skenderaj dhe Mitrovica, të cilët u rrëmbyen dhe u zhdukën dhunshëm nga forcat serbe më 19 prill 1999.
Kjo identifikim vjen në më pak se dy muaj nga konfirmimi i varrit të parë masiv në Kalludër, më 27 korrik. Menjëherë pas marrjes së raporteve, Komisioni Qeveritar për Persona të Zhdukur dhe Instituti për Mjekësi Ligjore kanë njoftuar familjet e tri viktimave të identifikuara.
Kryeministri Kurti shprehu shpresën se në ditët dhe javët në vijim do të pranohen edhe raporte të tjera për mostrat e dërguara, duke theksuar se ndonëse asnjë përgjigje nuk mund të shuajë dhimbjen, njohja e së vërtetës u jep fund ankthit të pritjes për fatin e të dashurve, një pritje që për disa familje zgjat prej 24 vitesh.
Gjatë vizitës në varrezat masive në Kalludër, Kurti theksoi rëndësinë jetike që aktorët ndërkombëtarë, veçanërisht Shtetet e Bashkuara të Amerikës, Mbretëria e Bashkuar dhe Bashkimi Evropian, të shtojnë presionin mbi Serbinë për zbatimin e Deklaratës për Personat e Zhdukur, e arritur në Bruksel më 2 maj 2023. Kërkesa specifike është hapja e menjëhershme e arkivave, përfshirë ato të Brigadës së 37-të të Motorizuar të Ushtrisë Jugosllave, e cila ka kryer masakra në Kosovë, veçanërisht në Drenicë, dhe dokumentacioni i së cilës është klasifikuar nga Serbia në vitin 2014 për një periudhë 30-vjeçare.
Kurti riafirmoi angazhimin institucional të Kosovës për vazhdimin e kërkimeve në terren, mbështetjen e procesit të identifikimit dhe komunikimin e kujdesshëm me familjet e të zhdukurve. Ai theksoi se zbardhja e fatit të çdo personi të zhdukur dhunshëm është prioritet shtetëror i Republikës së Kosovës dhe një detyrim njerëzor, i cili mbetet i hapur për sa kohë një familje e vetme pret përgjigje. Kjo çështje, sipas Kurtit, do të jetë në qendër të angazhimit të tij dhe të Qeverisë së Kosovës, përfshirë edhe gjatë takimeve në Shtetet e Bashkuara dhe në kuadër të sesionit të 81-të të Asamblesë së Përgjithshme të Kombeve të Bashkuara.