Ylli amerikan i TikTok-ut, Alix Earle, fiton shuma të mëdha: Kërkon deri në gjysmë milioni euro për një postim.
Influencuesja amerikane Alix Earle kërkon nga 250 mijë deri në 500 mijë dollarë (rreth 227 mijë deri në 455 mijë euro) për një postim të vetëm në kuadër të bashkëpunimeve me marka të ndryshme. Kështu raporton revista prestigjioze “The Hollywood Reporter”.
Sipas revistës, për 25-vjeçaren, e cila ka ndërtuar një audiencë të gjerë në platformën TikTok, thelbësore për të pranuar një bashkëpunim është nëse ajo vërtet pëlqen produktin që i ofrohet për promovim. Babai i saj, Thomas Earle, ka deklaruar se nëse vajza e tij pëlqen mjaftueshëm një produkt, ajo është ndonjëherë e gatshme ta promovojë edhe pa pagesë.
“Në njëfarë mënyre, mund të duket e çuditshme të shpenzosh kaq shumë para, por unë besoj vërtet te qëndrueshmëria dhe te ruajtja e besimit që kam ndërtuar me audiencën time,” është shprehur Earle.
Përveç bashkëpunimeve reklamuese, influencuesja ka filluar të investojë edhe në kompani të ndryshme. Ajo ishte ndër investitorët e hershëm në kompaninë e pijeve me bazë prebiotike Poppi, të cilën gjiganti PepsiCo e bleu vitin e kaluar për 1.95 miliardë dollarë (rreth 1.77 miliardë euro). Ajo zotëron gjithashtu aksione në markën e produkteve të mirëqenies Cymbiotika, ndërsa është investitore dhe ambasadore e markës së koktejeve të gatshme në kanaçe SipMARGS. Në mars, Earle prezantoi edhe markën e saj të produkteve për kujdesin e lëkurës, Reale Actives, duke zgjeruar më tej veprimtarinë e saj në industrinë e bukurisë.
Gjatë intervistës për revistën, ajo foli edhe për kritikat që kishte marrë pasi, në një intervistë për revistën “Interview” në shtator, kishte deklaruar se nuk kishte lexuar asnjë libër gjatë jetës së saj. “Për ta bërë të qartë: E kam lexuar patjetër librin, por jo, nuk lexoj në mënyrë aktive. Për momentin nuk jam duke lexuar asgjë,” sqaroi ajo.
Alix Earle u bë e famshme gjatë pandemisë së COVID-19, falë videove të publikuara në TikTok, ku fitoi miliona ndjekës me përmbajtjet e saj rreth përditshmërisë, bukurisë dhe stilit të jetesës. Vitin e kaluar, ajo u rendit e dyta në sezonin e 34-t të spektaklit “Dancing with the Stars”. Ndërkohë, në shtator, në Netflix debutoi edhe reality show i familjes së saj, “Earle Meets World”, i cili, sipas raportimeve, është rinovuar për një sezon të dytë këtë muaj.
