Kryeministri i Kosovës, Albin Kurti, ka kërkuar bashkëpunim nga partitë e tjera pas zgjedhjeve parlamentare, të cilat nuk i siguruan partisë së tij Vetëvendosje shumicën e nevojshme për të qeverisur e vetme. Ky zhvillim vjen pas një ngërçi politik 18-mujor në vend, raporton Reuters.
Kosova synon anëtarësimin në Bashkimin Evropian, por Brukseli kërkon krijimin e institucioneve të forta dhe zbatimin e reformave thelbësore. Paqëndrueshmëria politike ka penguar funksionimin e institucioneve, ka vonuar reformat dhe ka frenuar fluksin e fondeve të BE-së, ndërsa analistët politikë parashikojnë vazhdimin e ngërçit.
Sipas rezultateve zyrtare, pas numërimit të 100% të fletëvotimeve të zgjedhjeve të së dielës – të tretat në më pak se 18 muaj – Vetëvendosje siguroi 42.91% të votave. Pas saj u rendit Partia Demokratike e Kosovës (PDK) me 21.12%, ndërsa Lidhja Demokratike e Kosovës (LDK) mori 17.58%. Edhe pse ende mbeten pa numëruar rreth 100,000 vota nga diaspora, është e qartë se Vetëvendosje nuk do të arrijë shumicën absolute për të qeverisur e vetme.
“Në javët e ardhshme do të komunikojmë, do të takohemi me opozitën dhe do të bashkëpunojmë me të gjitha subjektet politike,” deklaroi Kurti para mbështetësve të tij të dielën në mbrëmje. Pavarësisht faktit që partia e tij nuk siguroi shumicën absolute, mbështetësit e Kurtit festuan fitoren deri në orët e para të së hënës në Prishtinë.