SHBA-ja e nis me spektakël Botërorin, thyen rekorde historike
Kombëtarja e Shteteve të Bashkuara të Amerikës arriti disa rekorde historike në fitoren bindëse 4-1 ndaj Paraguait, të premten mbrëma, në ndeshjen e Kupës së Botës të luajtur në stadiumin SoFi të Los Anxhelosit.
Për herë të parë në histori, SHBA-ja siguroi një avantazh 3-0 që në pjesën e parë të një ndeshjeje të Botërorit, duke shënuar njëkohësisht numrin më të lartë të golave në një ndeshje të Kupës së Botës.
Folarin Balogun shënoi dy gola për amerikanët, duke u bërë lojtari i parë i SHBA-së që realizon më shumë se një gol në një ndeshje të Kupës së Botës që nga Bert Patenaude. Ish-sulmuesi amerikan kishte shënuar një “hat-trick” në vitin 1930. Ironikisht, edhe në atë ndeshje SHBA-ja kishte mundur Paraguain.
Edhe goli i parë i shënuar nga Weston McKennie pati rëndësi historike. Sipas Opta-s, ai ishte goli i tretë më i shpejtë i realizuar ndonjëherë nga një kombëtare pritëse në ndeshjen hapëse të Kupës së Botës. Franca kishte shënuar pas vetëm 35 sekondash në Botërorin e vitit 1938, ndërsa Gjermania pas 5 minutash e 8 sekondash në vitin 2006.
Me fitoren e së premtes, SHBA-ja vendosi një tjetër rekord, duke shënuar katër gola në një ndeshje të Botërorit – numri më i lartë në historinë e saj në këtë garë. Gjithashtu, amerikanët shënuan tre ose më shumë gola në një ndeshje të Kupës së Botës për herë të parë që nga viti 2002.
Për SHBA-në, kjo ishte gjithashtu ndeshja e parë e Kupës së Botës e zhvilluar në tokën amerikane që nga humbja 1-0 ndaj Brazilit në vitin 1994 në Stanford të Kalifornisë, turneu i fundit kur Shtetet e Bashkuara organizuan Kupën e Botës.