**Kryetari Ekrem Kastrati thërret qytetarët të mbështesin FC Malishevën kundër Hibernianit**
Kryetari i Komunës së Malishevës, Ekrem Kastrati, i ka drejtuar një thirrje të fortë qytetarëve, tifozëve dhe të gjithë dashamirëve të futbollit në Kosovë, duke kërkuar mbështetje për FC Malishevën në ndeshjen vendimtare kundër skuadrës skoceze Hibernian FC. Kjo ndeshje, e vlefshme për fazën play-off të UEFA Conference League, është një moment kyç për klubin.
Përmes një postimi në rrjetet sociale, Kastrati ftoi një numër sa më të madh tifozësh të jenë të pranishëm në stadiumin “Fadil Vokrri” në Prishtinë, ku ndeshja zhvillohet sot, duke nisur në orën 16:30.
Në mesazhin e tij, Kastrati theksoi: “FC Malisheva sot përballet me klubin e njohur Hibernian FC nga Skocia, në ndeshjen e play-off-it të UEFA Conference League. Pas rrugëtimit historik deri këtu, sot kemi një tjetër mundësi për të treguar forcën, karakterin dhe krenarinë e Malishevës në arenën evropiane.”
Ai bëri apel që qytetarët e Malishevës, tifozët e klubit dhe të gjithë futbolldashësit nga Kosova ta mbushin stadiumin, duke qenë pranë ekipit në këtë përballje jetike. “Ftoj të gjithë qytetarët e Malishevës, tifozët tanë dhe dashamirët e futbollit nga mbarë Kosova që të jenë pranë ekipit tonë në këtë sfidë të madhe evropiane,” nënvizoi kreu i Komunës së Malishevës.
FC Malisheva shpreson të vazhdojë ëndrrën evropiane me një rezultat pozitiv kundër skuadrës skoceze, në atë që konsiderohet si një nga ndeshjet më të rëndësishme në historinë e klubit.