**Pse SHBA-të zhvendosën bombarduesit nga baza RAF Fairford? Trump: Kishte kërcënime**
Presidenti i Shteteve të Bashkuara, Donald Trump, deklaroi se SHBA-të i kanë tërhequr bombarduesit e tyre nga baza RAF Fairford në Mbretërinë e Bashkuar për shkak të kërcënimeve të caktuara ndaj kësaj baze.
Duke folur me gazetarët të hënën, teksa nisej për në Nebraska, Trump theksoi se SHBA-të kishin marrë njoftime për një “kërcënim”, i cili i nxiti ata të zhvendosnin bombarduesit.
“Po, mendoj se mund ta themi këtë. Ata nuk u larguan rastësisht. Pati disa kërcënime. Dhe në vend që ta provokonim armikun, ne do ta mposhtim armikun. Por pse duhet t’i lëmë aty? Kështu që i zhvendosëm disi, jo shumë larg”, iu përgjigj Trump gazetarëve jashtë Shtëpisë së Bardhë. Kjo deklaratë erdhi pasi u pyet nëse një “kërcënim specifik” e kishte detyruar SHBA-në të tërhiqte bombarduesit nga baza ajrore.
Më herët të hënën, një zëdhënës i Forcës Ajrore Mbretërore (RAF) britanike kishte këmbëngulur se baza RAF Fairford ishte e sigurt. Ai kishte kujtuar edhe komentet e Trump javën e kaluar, ku presidenti vlerësonte “shërbimet policore, të mbrojtjes dhe të sigurisë” të Mbretërisë së Bashkuar në lidhje me bazën, sipas A2cnn.
Pentagoni kishte konfirmuar të dielën se i kishte larguar bombarduesit e tij nga baza dhe i kishte rikthyer në bazat e tyre në territorin amerikan.
Komentet e Trump konfirmojnë raportet e mediave amerikane se një kërcënim i ri rezultoi në tërheqjen e bombarduesve pas një incidenti të rëndësishëm më 27 shtator, kur policia u alarmua për tre “automjete të dyshimta” pranë bazës ajrore.