**Vdes Tom Skerritt, aktori i njohur i filmave “Top Gun” dhe “Alien”**
Aktori amerikan Tom Skerritt, i njohur kryesisht për rolet e tij në filmat e famshëm “Top Gun” dhe “Alien”, ka ndërruar jetë në moshën 93-vjeçare.
Ai ndërroi jetë nga shkaqe natyrore të mërkurën, ndërsa lajmin e konfirmoi familja e tij.
Nëpërmjet një deklarate prekëse, familjarët shprehën dhimbjen për humbjen e aktorit, duke vënë në pah jo vetëm karrierën e tij të jashtëzakonshme, por edhe humorin, mençurinë, bujarinë dhe dashurinë që kishte shpërndarë te të afërmit e tij, sipas raportimeve të Telegrafit.
Karriera gjashtëdhjetëvjeçare e Skerritt e bëri atë pjesë të disa prej produksioneve më të njohura të kinemasë. Në vitin 1970, ai u shqua në filmin satirik të luftës “M*A*S*H”, ndërsa në vitin 1979 interpretoi kapitenin Dallas në filmin fantastiko-shkencor “Alien”, me regji të Ridley Scott.
Një nga rolet e tij më ikonike ishte ai i komandantit Mike “Viper” Metcalf në filmin “Top Gun” të vitit 1986, ku portretizoi instruktorin e pilotëve që trajnonte personazhin e Tom Cruise, Pete “Maverick” Mitchell.
Përveç kinemasë, Skerritt pati një karrierë të suksesshme edhe në televizion.
Në vitin 1993, ai u vlerësua me çmimin Emmy si Aktori më i Mirë në Rol Kryesor në një serial dramatik, për interpretimin e tij të sherifit Jimmy Brock në serialin “Picket Fences”. Për të njëjtin rol, ai u nominua edhe një vit më vonë.
I lindur në Detroit, Tom Skerritt, para se t’i kushtohej aktrimit, kishte shërbyer në Forcat Ajrore të Shteteve të Bashkuara. Më vonë, ai u angazhua gjithashtu në mbështetjen e veteranëve të luftës, ndërsa familja theksoi se ai kishte një lidhje të veçantë me natyrën, krijimtarinë dhe pasionin për tregimin e historive.