**Carrick mbron Amad Diallon: “Një kënaqësi absolute të punosh me të”**
Trajneri i përkohshëm i Manchester United, Michael Carrick, i ka dalë në mbrojtje publikisht Amad Diallos, pas një gabimi me pasoja të sulmuesit gjatë fitores së fundit ndaj Liverpoolit.
Me kualifikimin në Ligën e Kampionëve tashmë të siguruar, Carrick theksoi se talenti ivorian mbetet një pjesë thelbësore e planeve të tij, duke e cilësuar anësorin si një “kënaqësi absolute” për të punuar me të.
United ka përjetuar një rikthim mbresëlënës nën drejtimin e Carrick, duke grumbulluar 32 pikë që nga marrja e detyrës në janar dhe duke siguruar zyrtarisht vendin në Champions League.
Megjithatë, Diallo ka kaluar një periudhë sfidash, përfshirë zëvendësimin në pushimin mes pjesëve kundër Brentfordit dhe një gabim të rëndë në mbrojtje që rezultoi në gol kundër Liverpoolit.
Pavarësisht kritikave pas atij momenti, Carrick shfrytëzoi konferencën për shtyp para ndeshjes me Sunderlandin për të theksuar besimin e tij të palëkundur te qëndrimi dhe potenciali i jashtëzakonshëm i sulmuesit.
Duke folur për ngushëllimin e lojtarit pas ndeshjes kundër Liverpoolit, Carrick ishte i qartë se gabimet nuk do ta përcaktojnë sezonin e 23-vjeçarit.
“Amad është mirë. Absolutisht mirë. Nuk ka asnjë problem. Ai ishte duke buzëqeshur pas ndeshjes,” tha Carrick. “Gabimet janë pjesë e futbollit. Edhe unë kam bërë. Kam bërë shumë si lojtar, e kuptoj, dhe ndonjëherë ato përfundojnë në gol. Ndonjëherë i bën dhe shpëton pa pasoja dhe askush nuk flet për to.”
Përtej gabimit, Carrick theksoi ndikimin e gjerë që lojtari ka pasur që nga marrja e detyrës prej tij në “Old Trafford”. Ai vlerësoi kontributin e plotë të lojtarit, duke thënë:
“Ai ka bërë kaq shumë gjëra të mira që kur unë jam rikthyer dhe ndikimi që ka pasur te skuadra, paraqitjet e tij dhe ajo që i jep ekipit, me topin, pa topin, energjinë e tij, qëndrimin ndaj lojës. Dhe ai ka qenë i shkëlqyer gjatë ditëve të fundit, ishte i shkëlqyer edhe pas ndeshjes dhe kështu duhet të jetë. Nuk ka asgjë për t’u ndier i mërzitur apo i zhgënjyer, sepse ka shumë gjëra përpara dhe është kaq i talentuar, kaq emocionues dhe një kënaqësi absolute të punosh me të. Pra, është në një gjendje të mirë dhe jam i sigurt se mezi pret ndeshjen e së shtunës.”