**Policia e Kosovës merr pjesë në ushtrimin e përbashkët operacional “Shpata e Artë 2026-1”**
Policia e Kosovës mori pjesë në ushtrimin e përbashkët operacional “Shpata e Artë 2026-1”, i cili u zhvillua më 2 dhe 3 korrik 2026, në Kampin e Njësive Speciale në Vrellë. Ky ushtrim u realizua në bashkëpunim me Forcën e Sigurisë së Kosovës (FSK), KFOR-in, Misionin e Bashkimit Evropian për Sundimin e Ligjit në Kosovë (EULEX) dhe AME-në.
Qëllimi kryesor i këtij ushtrimi ishte forcimi i bashkëpunimit ndërinstitucional dhe rritja e gatishmërisë së strukturave të sigurisë për të reaguar në mënyrë të koordinuar, në menaxhimin e incidenteve kritike dhe situatave me rrezik të lartë, duke zbatuar procedura të përbashkëta operative.
Skenari i ushtrimit trajtoi një sërë situatash komplekse, duke përfshirë reagimin ndaj kërcënimeve të sigurisë, identifikimin dhe menaxhimin e mjeteve shpërthyese, menaxhimin e protestave të dhunshme, përdorimin e mjeteve të specializuara, evakuimin e personave dhe koordinimin e plotë ndërinstitucional në terren.
Në këtë ushtrim u angazhuan njësi të ndryshme operative dhe mbështetëse të Policisë së Kosovës, si: Drejtoria e Njësive Speciale Operative (DNJSO), Njësia e Reagimit të Shpejtë (NJRSH), Njësia për Trajtimin e Mjeteve Eksplozive (NJTME), Njësia Detektive e Asistencës (NJDA), Departamenti i Sigurimit të Shërbimeve Shëndetësore (DSHSH), si dhe njësitë e Rendit Publik.
Ushtrimi u monitorua nga drejtues të lartë të institucioneve pjesëmarrëse dhe partnerëve ndërkombëtarë, të cilët vlerësuan lart nivelin e profesionalizmit, disiplinën operacionale dhe koordinimin ndërinstitucional të treguar gjatë zbatimit të skenarit.
Policia e Kosovës rikonfirmoi përkushtimin e saj për ngritjen e vazhdueshme të kapaciteteve operacionale, forcimin e bashkëpunimit me partnerët vendorë dhe ndërkombëtarë, si dhe garantimin e sigurisë dhe rendit publik në Republikën e Kosovës.