Islandezët kanë votuar për të mbetur jashtë Bashkimit Europian, duke refuzuar nismën e qeverisë për rihapjen e bisedimeve të anëtarësimit. Vendimi, i raportuar nga transmetuesi RUV të dielën dhe shkruar nga agjencia ndërkombëtare e lajmeve Reuters, tregon një preferencë të qartë ndaj mbrojtjes së ujërave të peshkimit, të cilat u konsideruan si shumë të rëndësishme për t’u vënë në rrezik.
Një votë kundër anëtarësimit pritet të shkaktojë zhgënjim në Bruksel. Disa zyrtarë të BE-së e kishin konsideruar Islandën si një rast me rrezik të ulët, i cili mund të ndihmonte në zbutjen e skepticizmit ndaj zgjerimit të bllokut dhe në forcimin strategjik të tij, veçanërisht në një kohë kur siguria në Arktik është në qendër të vëmendjes.
Qeveria e kishte paraqitur planin e anëtarësimit si një mundësi “tani ose kurrë”. Kryeministrja Kristrun Frostadóttir u kishte thënë votuesve në gusht se një votë kundër do t’u jepte fund të gjitha spekulimeve lidhur me BE-në.
Mbështetësit e fushatës pro anëtarësimit theksuan se anëtarësimi në bllok mund të ulte normat e larta të interesit dhe të ofronte më shumë siguri në një botë të tronditur nga lufta në Ukrainë dhe retorika e ish-presidentit amerikan Donald Trump për aneksimin e një ishulli tjetër të Arktikut, Grenlandës.
Nga ana tjetër, aktivistët kundër anëtarësimit paralajmëruan se hyrja në BE do të kërcënonte sovranitetin dhe ujërat e pasura të peshkimit të ishullit.
Fushata për referendumin ka nxitur një debat të thellë mbi pozitën e Islandës në botë, u shpreh kryeministrja Frostadóttir gazetarëve, pasi hodhi votën e saj në kryeqytet të shtunën. “Është një ditë e madhe. Kemi pritur prej vitesh për të qenë në gjendje të votojmë,” tha ajo, duke shtuar se qeveria e saj do të vazhdonte punën pavarësisht rezultatit.
Islanda aplikoi për herë të parë për t’iu bashkuar BE-së në vitin 2009, pas një krize financiare që goditi ekonominë e vogël dhe të prekshme të vendit. Megjithatë, një qeveri euroskeptike i dha fund bisedimeve në vitin 2013.
Trazirat gjeopolitike aktuale, duke përfshirë luftën në Lindjen e Mesme dhe tarifat amerikane të importit, i kanë shtuar urgjencën kësaj çështjeje, për të cilën islandezët kanë debatuar herë pas here për dekada.