Trajneri i Atletico Madridit, Diego Simeone, ka bërë komente ironike ndaj Lamine Yamal, yllit të Barcelonës, duke deklaruar: “Është lojtar i mirë, por do të na shikojë në TV”. Argjentinasi theksoi se talenti spanjoll ka shumë potencial, por që nuk është ende në nivelin për t’u cilësuar si “mbreti i Evropës”.
Simeone e përgëzoi Yamal-in për paraqitjen e tij të mbrëmshme, por shprehu mendimin se ai mbetet larg legjendave si Lionel Messi dhe Cristiano Ronaldo, sipas raportimeve të “Gazeta Express”. Më tej, ai deklaroi se përfaqësuesi spanjoll mund ta shohë Atletico Madridin duke luajtur vetëm përmes televizorit, pasi Barcelona u eliminua në çerekfinale të kësaj gare.
“Ai është një djalë i mirë me shumë talent,” u shpreh Simeone. “Dje ai ishte i vetëm përballë portierit dhe shënoi ndaj nesh. Mediat duan ta kurorëzojnë atë mbret të Evropës. Por në futboll, e vetmja gjë që ka rëndësi është kush gjendet në short nesër në mëngjes.”
Ai shtoi: “Shtypi kërkon që unë të kem frikë nga një adoleshent vetëm sepse ai bën driblime. Ju lutem! Për një dekadë, më është dashur të qëndroj në vijën anësore dhe ta shoh Cristiano Ronaldon të shënojë hat-trick për të eliminuar ekipin tim nga kjo garë.”
“Kjo është frika e vërtetë. Lamine luajti një ndeshje të bukur ndaj nesh, por realiteti është se ne do të shkojmë në gjysmëfinale dhe ai do të shkojë në shtëpi për të na parë në televizor. Ka një ndryshim të madh ndërmjet luajtjes së një ndeshjeje të mirë dhe të qenit një makth.”
Atletico humbi mbrëmë 1:2 në ndeshjen e kthimit të çerekfinales në shtëpi, por u kualifikua në gjysmëfinale falë fitores që kishte regjistruar javën e kaluar në “Camp Nou”.