**Tre muaj pas humbjes së policit Altin Kryeziu, motra e tij ndan mesazh prekës dhe familja kërkon drejtësi**
Kanë kaluar tre muaj që nga dita kur zyrtari policor Altin Kryeziu ndërroi jetë, pasi u godit nga një veturë gjatë kryerjes së detyrës në Malishevë. Megjithëse koha ecën, për familjen e tij, mungesa vazhdon të jetë po aq e rëndë sa dita e parë.
Aulonë Kryeziu, motra e policit të ndjerë, ka ndarë një dedikim të ndjerë në rrjetet sociale, duke shprehur dhimbjen e thellë për humbjen e vëllait.
“Koha ecën, por zemra ime ka mbetur aty ku të humba. Mungesa jote është një dhimbje që nuk njeh shërim, e malli për ty do të jetojë në çdo rrahje të zemrës sime,” ka shkruar ajo, duke reflektuar ndjenjat e saj.
Ajo thekson se është ende e pamundur të mësohet me jetën pa Altinin, duke e përshkruar mungesën e tij si një dhimbje të patolerueshme. “Jeta është shumë e vështirë pa ty, vëllai jem,” përfundon ajo mesazhin e saj prekës.
Altin Kryeziu, pjesëtar i Stacionit Policor në Malishevë, u godit nga një automjet më 16 gusht, në rrugën “Ibrahim Mazreku”, teksa ishte në krye të detyrës zyrtare. Ai ndërroi jetë më 23 gusht, si pasojë e plagëve të rënda të marra.
Paralelisht me dhimbjen, familjarët e Altinit kanë ngritur zërin për drejtësi dhe transparencë rreth rastit. Më 13 nëntor, familjari Valon Kryeziu u bëri thirrje Kryeprokurorit të Shtetit dhe mediave që procesi gjyqësor të monitorohet nga afër dhe të shqyrtohen me kujdes të gjitha rrethanat e ngjarjes.
Altin Kryeziu u varros me nderime shtetërore më 24 gusht në fshatin Bubavec të Malishevës, duke lënë pas një boshllëk të madh në familje dhe komunitet.