Trajneri i Zvicrës, Murat Yakin, ka reaguar ashpër ndaj arbitrimit pas eliminimit të ekipit të tij nga Argjentina, duke theksuar se “futbolli nuk ishte fituesi” në ndeshjen vendimtare. Yakin e cilësoi vendimin kyç të arbitrit si një gabim që përcaktoi fatin e takimit.
Tekniku zviceran deklaroi se skuadra e tij u ndëshkua padrejtësisht për një situatë që, sipas tij, nuk duhej të ishte sanksionuar me karton. “U ndëshkuam për shkak të një gabimi. Nuk kishte asnjë arsye për atë karton. Nuk e kuptoj. Ishte një situatë e pafajshme, nuk kishte asgjë të qëllimshme,” theksoi Yakin.
Ai kritikoi gjithashtu mënyrën se si gjyqtari dhe sistemi VAR interpretuan episodin, duke shprehur mosbesimin e tij. “Ai vendim ishte thjesht i pabesueshëm. Nuk pajtohem aspak me të. Kishte kontakt të qartë dhe nuk e kuptoj se si gjyqtari dhe VAR-i arritën në atë përfundim,” shtoi trajneri.
Megjithatë, Yakin mohoi se Argjentina ishte favorizuar gjatë gjithë ndeshjes, duke theksuar se përballja ishte e barabartë dhe e hapur. “Nuk do të thosha se ata u favorizuan. Ishte një ndeshje e drejtë dhe e hapur. Të dyja skuadrat luajtën futboll. Por futbolli nuk ishte fituesi sot. Ne u ndëshkuam nga një gabim. Ishte momenti vendimtar që përcaktoi rezultatin e ndeshjes. Mund të ankohemi tani, por duhet ta uroj Argjentinën,” përfundoi trajneri i Zvicrës.