Zbulohet oferta e refuzuar e Real Madridit për Rodrin
Real Madridi kishte paraqitur një ofertë për transferimin e mesfushorit Rodri në fillim të verës, por ajo u refuzua nga Manchester City, e cilësuar si e pamjaftueshme.
Sipas mediumit spanjoll El Chiringuito TV, Real Madridi i ofroi Manchester Cityt 45 milionë euro për transferimin e mundshëm të Rodrit në fillim të kësaj vere.
Los Blancos fillimisht dukeshin si favoritët kryesorë për të siguruar shërbimet e mesfushorit spanjoll, fituesit të Ligës së Kombeve me Spanjën. Megjithatë, rivali i tyre i përbetuar, Barcelona, ndërhyri papritur duke ndryshuar rrjedhën e garës për transferimin e tij.
Pasi City refuzoi ofertën e ulët të Real Madridit, Rodri gjithashtu ndryshoi papritur preferencën e tij, duke i dhënë përparësi Barcelonës.
Klubi katalanas tashmë është pranë finalizimit të transferimit të 27-vjeçarit, pasi ka arritur një marrëveshje me Manchester Cityn me vlerë 60 milionë euro fikse, plus 16 milionë euro në bonuse të mundshme.
Ndërkohë, Real Madridi ka ndërprerë kërkimin për një alternativë ndaj Rodrit. Trajneri Carlo Ancelotti do të duhet të mbështetet në opsionet e disponueshme në skuadrën e tij, duke përfshirë edhe lojtarët e afruar gjatë kësaj vere.