**Bastisje në Zubin Potok: Policia konfiskon AK-47, municion dhe pajisje ushtarake**
Policia e Kosovës kreu dje bastisje në pesë lokacione të ndryshme në Zubin Potok, ku zbuloi dhe konfiskoi një arsenal armësh të paligjshme, duke përfshirë një pushkë automatike AK-47, municion të shumtë, radiolidhje, maska gazi dhe pajisje të tjera ushtarake.
Sipas raportit të Policisë, aksioni u zhvillua gjatë gjithë ditës së djeshme dhe rezultoi në këto gjetje:
* Në shtëpinë e një të dyshuari mashkull, njësitë policore gjetën dhe konfiskuan një pushkë automatike AK-47, një revole, 446 fishekë, 42 karikatorë, një radiolidhje dhe pajisje të tjera me karakter ushtarak.
* Në një tjetër adresë, gjithashtu në shtëpinë e një të dyshuari mashkull, policia konfiskoi një pushkë gjuetie, një revole dhe dy fishekë.
* Gjatë bastisjes në shtëpinë e një të dyshuare femër, u gjet një pushkë gjuetie me leje.
* Në shtëpinë e një tjetër të dyshuari mashkull, u zbuluan dhe konfiskuan 178 fishekë të kalibrave të ndryshëm, një maskë gazi, dy radiolidhje dhe disa pajisje për armë.
* Së fundmi, në një shtëpi të pabanuar, policia gjeti 30 fishekë të kalibrave të ndryshëm dhe 5 gëzhoja të armëve të gjata.
Të gjitha rastet, me vendim të prokurorit, do të vazhdojnë në procedurë të rregullt ligjore.